لارجع لعيونك مشتاق

كل ما وَدَعتْكْ و مْشَيْتْ
بْخُطى دربي عا سَفرْ

خُطى و الدَرْبْ طَويلْ
و خَطَرْ مَعي ...و ما خَطَرْ

حامل معي زوَادِة
مِنْ دَعْواتِكْ ما بَدَرْ

و دْموعكْ زُوادي و زادْ
عُنْوانْ العودة و سَفَرْ

كُل دمعة كانت دليل
خلفا أَقْتَفي الأثر

تَحميني مِنْ شَرْ الدَرْبْ
و هي دَليلي و خَبَرْ

لأرْجَعْ لَعْيونِكْ مشْتاقْ
و أفْهَمْ شو مَعْنى البَصَرْ

مُشتاقْ لبوس الاِيدِيِنْ
و أنسى كُلْ ما خَطَرْ

أنا سافِر عَنِكْ غِيبْ
و عُدْ الرَجْعَة بِالْشِبِرْ

لأني كُلْ ما وَدَعْتْ
حِسْ بْقَلبِكْ يِنْفطِرْ

زِيدْ لَهَمِكْ همومْ
و هَمكْ لَهَمي سَترْ

عُدْ لَيَالي و أيامْ
و ذُوقْ من المُرْ الصَبرْ

كُنتِ الغَيْمْ و كُنتِ الشَمسْ
و كُنتِ لَزَرْعي المَطَرْ

كُنتِ الزرعْ و غْلال العُمرْ
و لِلياليِ العُمر القَمَرْ

كُنتِ لِلدَربْ المِشْوارْ
و أحلى ما بعُمري خَطَرْ

يا أُمي..لما وَدعتِ
تُهتْ... و تاه يا أُمي السَفَرْ

أنتِ تركتيني و رُحْتِ
و ما كُل البَشَرْ بَشَرْ

فُضتْ الدُنيا من حَوْلي
لما ...نْزِلتِ عا القَبرْ

عَم بِبْحَثْ عن كلامِكْ
و أذْكُرْ كلام و عِبَرْ

لما كُنتِ تحاكِني
و أسمَعْ مِنِك ما بَدَرْ

صَوْتِك لما كان و كان
و يا ما بِروحي انتَشَرْ

قُلتِ لي يا ابْني اِسْمَعْ
مِني حديث العُمرْ

يا ابني كان و يا ما كان
و عِشنا كباقي البَشَرْ

بَيْنْ مرح العَيشْ و مُرْ
بأمَلْ نِتْجاوز حُفَرْ

نِتْغَيَرْ مِنْ حال لحالْ
و تِمضي أيام العُمرْ

بالصَحة كُل شِي بِهونْ
لا تنسى هادا الخَبَرْ

حافِظْ علَيْها يا ابني
قَبل أرْزَلْ العُمرْ

أنا ما كان مني راح
راح و انتهى الأَمرْ

دِير بالَكْ حُبْ الناسْ
و سوي بالقَلْبْ الحُفَرْ

ملي قَلبكْ بِحُبْ الكُلْ
و شو ما مِنْهُمْ بَدَرْ

لا تِهْتَمْ لِمَنْ أساء
و بِالحُبْ تِمحي الأثر

لا تِهْتَمْ لقِيل و قالْ
و ارْتاحْ مَنْ اِعْتَبَرْ

اِمشي بِروحَكْ مِرْتاحْ
لا ضَغينة و لا ضَرَرْ

غَني مَوالَكْ و روح
بروحَك من وَتَرْ لوَتَرْ

روح ربي يَِحْميكْ
و يَحمي خطواتْ السَفَر

ياأُمي....